Fantasia DA! Abenduaren 6tik 10era, Durangoko Azoka fantasiaz beteko da eta Izarkomen, fantasia horren parte izan nahi dugu.
Izarkomen postua informazio gunea izateaz gain (informazioa eskuratu, bazkidetzak egin…), argitaratu berri dugun “Nerabeek mugikorra izate bidean laguntzeko helduentzako gida” banatzeko puntua izango da. Gainera, bazkide diren ekoizleen artean osatutako 100 eurotan baloratutako saskia ere zozketatuko dugu hurbiltzen direnen artean.
Etorri bisitan edo izan bolondres gurekin batera Izarkom proiektua lau haizetara zabaltzeko!
Aurten lehen aldiz euskal kulturaren egutegian ezinbesteko hitzordua den azokan izango gara. Telekomunikazio Burujabetzaren aldarria lau haizetara zabaltzeko helburuarekin, pil pilean dagoen mugikorren auzia apur bat argitzeko asmoz helduko gara.
Hala genioen urtarrileko albiste honetan: “Izarkomen gure bazkideen beharrei erantzuten saiatu izan gara beti, eta bada azken hilabete hauetan zabaldu den kezka bat: Noiz eta nola eman behar diegu nerabeei lehen mugikorra?
Galdera honek erantzun zehatzik ez badu ere, gure etxeetako ingurune digitala ahalik eta errespetuzkoena, hezitzaileena eta pedaogikoena izan dadin gida bat egitea beharrezko jo dugu.“
Eta iritsi da unea izan ere, urtebete inguru prestatzen daramagun sorkuntza kalean da iada: “Nerabeek mugikorra izate bidean laguntzeko helduentzako gida” hain zuzen. Aste honetan Argia astekariak banatu eta Durangoko Azokan eskuragarri izango du nahi duen orok.
Noiz eta nola eman behar diegu nerabeei lehen mugikorra? Aurkezpena
Abenduaren 6an 12:15etan
Gida abenduaren 6an aurkeztuko dugu Kabi@n teknologia eta kultura libreen gunean.
Gune honek kultura digitalaren eremuan aktiboak diren pertsonak biltzen ditu: sortzaileak, profesionalak, garatzaileak, ekintzaileak eta hezkuntza arlokoak.
Eta gu bertan izango gara eguerdiko 12:15etan. Ondoren, Artekaleko 033 zenbakian jarriko dugun Izarkomen postuan eskuratu ahal izango duzue gida.
Beraz, aukera baduzue ez galdu!!
Zozketa
Zatoz Izarkomen postura eta parte hartu zozketan!
Izarkomen bazkideen artean ekoizle ezinhobeak ditugu eta haien eguneroko lana bistaratzeko azokara ekarri nahi izan ditugu.
Hala, ehun eurotan baloratutako saskia zozketatuko dugu azokak irauten duen bitartean.
Parte hartzeko Izarkomen postura gerturatu eta zozketan izena eman.
Saskian datorren negua goxatzeko produktuak aurkituko ditugu:
- Errigoraren saski beltza
- Pikunieta Baserriko Harrixe Gazta
- Biba ardoak (3 botila)
- Zituene pasta
- Larreta esnekiak
Sariduna abenduaren 10ean igandean jakinaraziko dugu.
Zatoz gurekin Landako Gunera Izarkom proiektua zabaltzen laguntzera!
Azkenik bazkideoi laguntza eskatu nahi dizuegu. Durangoko Azokan bazkideon parte hartzea aberasgarria izan daitekeela uste dugu, zuon iritziak eta esperientziak herritarrekin partekatzeko aukera ederra izango delarik.
Horregatik, zuen denboraren zatitxo bat gurekin elkarbanatzeko prest zaudetenok bete ondorengo galdetegia, Azokara bertaratu zaitezken egun eta orduak adieraziz:
Nahi adina txanda bete ditzakezue, guztiak izango dira ongi etorriak!
Durangoko Azokara gerturatzeko plana duzuenok, Artekaleko 0033 postuan aurkituko gaituzue.
