Hartzea ematea DA!. Horixe dugu 59. Durangoko Azokaren lema
Durangoko Azokaren aurtengo edizioa abenduaren 5etik 8ra bitartean garatuko da, eta aurten ere, bertan izango da Izarkomen erakusmahaia.
Izarkomen postua informazio gunea izateaz gain (informazioa eskuratu, bazkidetzak egin…), “Nerabeek mugikorra izate bidean laguntzeko helduentzako gida” banatzeko puntua izango da. Gainera, Izarkomen produktu sorta zozketatuko dugu hurbiltzen direnen artean.
Etorri bisitan edo izan boluntario gurekin batera Izarkom proiektua lau haizetara zabaltzeko!
Izan boluntario Durangoko azokan!
Zatoz gurekin Landako Gunera Izarkom proiektua zabaltzen laguntzera!
Durangoko Azokan bazkideon parte hartzea aberasgarria izan daitekeela uste dugu, zuon iritziak eta esperientziak proiektuan interesa dutenekin partekatzeko aukera ederra baita.
Horregatik, zuen denboraren zatitxo bat gurekin elkarbanatzeko prest zaudetenok ondorengo galdetegia bete dezazuen eskatuko dizuegu. Bertan izango duzue zuen prestutasuna zein den adierazteko aukera.
Ondoren, izena ematen duzuenokin bilera telematiko bat egingo dugu abenduaren 2an astelehena arratsaldeko 17:00etan (grabatu egingo da bertaratu ezin duzuenontzat). Bilera honetan prestakuntza emango dugu: azokari buruzko informazio praktikoa eta Izarkomi buruz egiten diren ohiko galderen errepasoa eginez.
Animatu, proiektua zabaltzeko behar zaituztegu!
Aurten ere Durangora ez gara esku hutsik joango eta laster eskaintzeko moduan izango garen ZERBITZU BERRIAREN AURKEZPENA egingo dugu.
Begizta telebista zerbitzuaren berri abenduaren 6an emango dugu arratsaldeko 17:00etan Landakoguneko Kabi@ gunean.
Ez galdu aukera eta zatozte proiektu berri honi buruzkoak ezagutzera!
BEGIZTA TELEBISTA ZERBITZUA
Badator Begizta! Izarkomek beste hainbat eragilerekin batera osatu eta eskainiko duen online bidezko telebista zerbitzuen plataforma.
Euskarazko tokiko telebistak euskal herritar guztiengana heltzeko zubia eta aldi berean herritar guztiei Euskal Herrian sortzen den eduki guztietarako sarbidea eskaintzeko sortua.
Begizta web bidezko nabigatzaile bidez edo telebista adimendunetan ikusteko moduan izango da eta zerbitzua hasiera batean Izarkom eta Onaro telekomunikazio operadoreek eskainiko dute.
Besterik gabe, zuon berri izango dugulakoan, Durangoko azokan itxarongo zaituztegu!